КОНСТИТУТСИЯ – КАФИЛИ ҲУҚУҚУ ОЗОДИҲОИ ИНСОН ВА ПОЯИ ДАВЛАТДОРИИ МИЛЛӢ

Дар МД «Маркази ҷумҳуриявии таълимию клиникии тибби оилавӣ» бахшида ба Рӯзи қабули Конститутсияи Ҷумҳурии Тоҷикистон маҷлиси тантанавӣ баргузор гардид.

5 ноябри соли 2026 дар Муассисаи давлатии «Маркази ҷумҳуриявии таълимию клиникии тибби оилавӣ» бахшида ба 32-солагии қабули Конститутсияи Ҷумҳурии Тоҷикистон маҷлиси тантанавӣ баргузор гардид.

Дар чорабинии мазкур роҳбарият, кормандони сохторҳои гуногун, табибон ва дигар мутахассисони муассиса иштирок намуда, доир ба аҳаммияти таърихию сиёсии Конститутсия, нақши он дар таҳкими давлатдории миллӣ ва таъмини ҳуқуқу озодиҳои инсон ва шаҳрванд ибрози андеша намуданд.

Зимни чорабинӣ таъкид гардид, ки қабули Конститутсияи Ҷумҳурии Тоҷикистон 6 ноябри соли 1994 яке аз рӯйдодҳои муҳим ва сарнавиштсоз дар таърихи навини давлатдории тоҷикон ба ҳисоб рафта, барои бунёди давлати соҳибистиқлол, демократӣ, ҳуқуқбунёд, дунявӣ ва иҷтимоӣ заминаи устувори ҳуқуқӣ фароҳам овард.

Конститутсия ҳамчун санади олии ҳуқуқии кишвар на танҳо асосҳои сохтори давлатдориро муайян менамояд, балки ҳифзи ҳуқуқу озодиҳои инсон ва шаҳрванд, таъмини волоияти қонун, таҳкими сулҳу субот, ваҳдати миллӣ ва рушди устувори ҷомеаро кафолат медиҳад.

Маҳз бо такя ба арзишҳо ва меъёрҳои конститутсионӣ дар даврони соҳибистиқлолӣ Тоҷикистон дар самтҳои гуногуни ҳаёти сиёсӣ, иқтисодӣ, иҷтимоӣ ва фарҳангӣ ба дастовардҳои назаррас ноил гардид.

Конститутсия ва рушди соҳаи тандурустӣ

Дар ҷараёни маҷлис махсусан ба нақши Конститутсия дар ҳифзи саломатии аҳолӣ ва рушди соҳаи тандурустӣ таваҷҷуҳ зоҳир карда шуд.

Мувофиқи моддаи 38-и Конститутсияи Ҷумҳурии Тоҷикистон ҳар шахс ҳуқуқи ҳифзи саломатӣ дорад. Ин меъёри конститутсионӣ масъулияти давлат ва ҷомеаро дар самти фароҳам овардани шароити мусоид барои ҳифзи саломатии аҳолӣ муайян менамояд.

Зикр гардид, ки дар солҳои соҳибистиқлолӣ бо дастгирӣ ва сиёсати иҷтимоии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи тандурустии мамлакат марҳила ба марҳила рушд намуда, дар самтҳои зерин пешрафтҳои назаррас ба даст оварда шудаанд:

бунёд ва таҷдиди муассисаҳои тиббӣ дар шаҳру ноҳияҳои кишвар;

ворид намудани таҷҳизоти муосири ташхисӣ ва табобатӣ;

беҳтар намудани дастрасии аҳолӣ ба хизматрасониҳои тиббӣ;

татбиқи барномаҳои миллӣ оид ба ҳифзи саломатии модару кӯдак;

тақвияти кумаки аввалияи тиббию санитарӣ ва рушди тибби оилавӣ;

баланд бардоштани сатҳи дониш ва малакаи касбии кормандони соҳаи тандурустӣ.

Таъкид шуд, ки дар шароити имрӯза кормандони соҳаи тандурустӣ бояд бо истифода аз донишҳои муосири тиббӣ, таҷрибаи касбӣ ва риояи меъёрҳои ахлоқи тиббӣ баҳри ҳифзи саломатии аҳолӣ ва баланд бардоштани сифати хизматрасонии тиббӣ саҳми арзандаи худро гузоранд.

Масъулияти кормандони тиб дар назди ҷомеа

Кормандони соҳаи тандурустӣ дар иҷрои рисолати касбии худ ҳамарӯза бо ҳаёт, саломатӣ ва ҳуқуқу манфиатҳои инсон сарукор доранд. Аз ин рӯ, эҳтиром ба инсон, риояи ҳуқуқи бемор, таъмини дастрасӣ ба кумаки тиббии босифат, муносибати эҳтиромона бо муроҷиаткунандагон ва иҷрои софдилонаи вазифаҳои хизматӣ бояд меҳвари фаъолияти ҳар як мутахассиси тиб бошад.

Дар ин замина, кормандони МД «Маркази ҷумҳуриявии таълимию клиникии тибби оилавӣ» низ вазифадоранд, ки бо дарки масъулияти баланди касбӣ дар самти рушди тибби оилавӣ, такмили ихтисоси мутахассисон ва баланд бардоштани сифати кумаки аввалияи тиббию санитарӣ саҳми муассир гузоранд.

Дар фарҷоми чорабинӣ иштирокчиён иброз доштанд, ки эҳтиром ва риояи Конститутсия, ҳифзи арзишҳои миллӣ, таҳкими ваҳдати миллӣ ва хизмат ба нафъи ҷомеа вазифаи шаҳрвандӣ ва қарзи ҳар як сокини мамлакат мебошад.

Конститутсия – рамзи соҳибистиқлолӣ, кафили ҳуқуқу озодиҳои инсон ва заминаи устувори рушди Тоҷикистони соҳибистиқлол аст!

Рӯзи қабули Конститутсияи Ҷумҳурии Тоҷикистон муборак бод!

Бигзор сулҳу субот, ваҳдати миллӣ ва пешрафту ободии Тоҷикистони азиз ҳамеша пойдор бошад!